Noticias
A obra "Semente de dramón", producida polas compañías Ancoraxe e Morraoconto, gaña o Certame Manuel María de Proxectos Teatrais na súa 5ª edición
09/11/2026
A obra contará con un mínimo de 40 representacións nas cidades e vilas galegas grazas á colaboración do CDG, concellos e Deputacións
O Espazo Cultural Manuel María da cidade da Coruña, recentemente aberto ao público, serviu hoxe de escenario para a entrega do premio correspondente á 5ª edición do Certame Manuel María de Proxectos Teatrais convocado pola Fundación e Casa-Museo Manuel María coa colaboración das Deputacións da Coruña e Lugo; do Centro Dramático Galego; das Mostras de Teatro de Ribadavia e Cariño e dos concellos da Coruña, As Pontes, Ames, Arteixo, Barbadás, Betanzos, Brión, Cangas, Cambados, Carballo, Cariño, Carral, Catoira, Cedeira, Culleredo, Melide, Moaña, Monforte, Negreira, O Barco, O Grove, Oleiros, Padrón, Ponteareas, Pontevedra, Rianxo, Ribadeo, Ribeira, Sada, Santiago, Tomiño, Verín, Vilagarcía e Viveiro.
Nesta 5ª edición o premio recaeu na obra Semente de dramón, baixo a dirección de Sara Rey e Rafa R. Martínez, presentada conxuntamente a concurso polas compañías Ancoraxe Escénicas e Compañía Morraoconto sobre o texto teatral de Manuel María Semente de dramón dos medios de comunicación. O proxecto gañador “revisita a farsa de Manuel María botando man de referentes actuais, tanto estéticos como conceptuais, que afondan no bombardeo informativo ao servizo dunha sociedade na que a masa dilúe as individualidades e o capitalismo acaba sendo esa Pantasma Famenta que nos devora na súa arela globalizadora”.
O Xurado estivo presidido por Quico Cadaval, director, actor, e autor teatral, ademais de contador de historias; actuaron de vogais Paula Carballeira, directora, actriz, autora teatral e narradora oral. Premio Nacional de Literatura Dramática; Cristina Domínguez, docente da Escola Superior de Arte Dramática, directora e autora teatral. Exerceu de secretario Alberte Ansede, Presidente da Fundación Manuel María, que actuou con voz mais sen voto.
A resolución do premio foi tomada por unanimidade e o xurado remarcou que “a proposta profundiza no procedemento satírico de Manuel María apoiándose nun elenco e nun equipo artístico ecléctico, que bota man de diferentes ferramentas escénicas (música, cancións, coreografías) para achegar a mensaxe e a estratexia satírica de Manuel María. Así mesmo, salientou que “as dúas compañías asociadas, fascinadas pola actualidade da mensaxe do autor, indagan no “como”, “onde” e “quen” controla o relato nos mass media, servíndose dunha linguaxe artística anovadora e contemporánea”.
Finalmente o xurado destacou o acerto de que “a proposta escénica estea dominada por un alento lúdico que alivia e compensa a tensión crítica que une a obra de Manuel María, --feita naqueles tempos de incerteza e esperanza--, coa dramaturxia actual, que se esforza en deitar algo de luz no escuro panorama cívico que nos aparece no horizonte”.
Este Certame ten carácter bienal e está destinado ás compañías profesionais galegas. Nel prémiase a mellor proposta escénica dunha obra de Manuel María, co compromiso por parte da compañía gañadora de levala a escena no prazo máximo de 10 meses. Despois estará en cartel, cando menos, até rematar o ano 2028.
Respecto ao premio outorgado adóptase unha fórmula orixinal que combina a axuda económica para producir o espectáculo e unha ampla xira de representacións. O galardón garante nada menos que 40 representacións en outras tantas cidades e vilas galegas grazas á colaboración das Deputacións, concellos e diferentes Mostras de Teatro. Ademais diso a propia Fundación achega 4.200 euros como axuda á produción e o CDG achega outros 15.000. O presidente da Fundación Manuel María, Alberte Ansede, resaltou precisamente a singularidade deste Certame en canto que “o mellor recoñecemento para unha obra teatral é a súa difusión pois, ao fin, o que máis desexa unha compañía profesional é chegar ao seu público.”
O encargado da entrega do Premio foi o propio Alberte Ansede, sendo recibido por Sara Rey, Laura Pouso e Miguel Gendre, directora e actores da obra premiada. No acto da entrega tamén participaron, ademais das persoas do xurado, Francisco Javier Núñez, Director do Centro Dramático Galego; e Natividade González, responsábel de Cultura da Deputación da Coruña.
Galería de fotos
Entrega do premio da Vª edición do Certame Manuel María de Proxectos Teatrais
Membros do xurado (Quico Cadaval, Cristina Domínguez e Paula Carballeira); Francisco Javier Núñez, director do Centro Dramático Galego; Natividade González, responsábel de Cultura da Deputación da Coruña; e Alberte Ansede, presidente da Fundación Manuel María
Manolo Bouzón (2026)