Actividades
Este domingo, camiñada por Vicinte
A Casa-Museo Manuel María propón unha nova descuberta do patrimonio natural e artístico da contorna
Este domingo, 8 de xuño, a Casa-Museo Manuel María organiza unha camiñada por Vicinte, no concello de Outeiro de Rei. A descuberta do patrimonio arqueolóxico, artístico e natural desta parroquia que linda co concello de Friol e de Lugo será o fío condutor do roteiro que será acompañado, nas distintas paradas, por textos e poemas de Manuel María.
A camiñada, dinamizada polo divulgador cultural Orlando Viveiro, ten unha distancia de oito quilómetros e unha dificultade baixa. O seu inicio está programado para as 9.45 (previamente, ás 9.30, os participantes quedarán na Casa-Museo Manuel María, en Outeiro de Rei, para se trasladar en automóbeis até o campo da festa de Vicinte).
No decorrer do itinerario visitarase a madorra de Bravos, que conserva a cámara do enterramento, para baixar até un muíño situado no río Narla. A seguir, irase á capela de Nosa Señora, construción románico-gótica onde houbera unha cofraría chamada "do rosario" que tivera como base este santuario. Despois o roteiro encamiñarase na procura da cruz do Camiño de Piares e de alí os participantes irán cara á capeliña de San Marcos, situada no lugar de San Clodio, para, finalmente, andar o derradeiro tramo que voltará ao punto de inicio da ruta.
A actividade é gratuíta. As persoas interesadas en participar deben inscribirse en contacto@casamuseomanuelmaria.gal ou a través do whatsapp 698177621.