Noticias

Xornada de portas abertas dirixida a profesorado

A iniciativa ten por obxectivo ofrecer ao profesorado de calquera etapa todo tipo de información sobre os recursos dispoñíbeis e as posibilidades dunha visita escolar á Casa-Museo Manuel María e á súa contorna

Son moitas as solicitudes para programar visitas escolares á Casa-Museo en Outeiro de Rei para o presente curso escolar as que estamos a recibir, dato que fai presaxiar unhas Letras Galegas moi dinámicas e participativas nas nosas aulas.

Para orientar e axudar todo o posíbel ao profesorado encargado das visitas escolares convocamos a todas as persoas interesadas a unha xornada informativa aberta o vindeiro sábado 3 de outubro ás 10.30 da mañá: explicaremos como funcionan as visitas guiadas á Casa-Museo, que recursos ou posibilidades ofrece esta para o alumnado, con que recursos complementarios contamos para traballar previamente a visita na aula...

Tamén nos achegaremos, ao longo da xornada, a aqueles espazos da contorna de Outeiro tantas veces evocados por Manuel María na súa obra: a Carballeira da Santa Isabel, as Penas de Rodas, a olaría de Bonxe, a Lagoa de Cospeito...Un autobús permitiranos facer comodamente todos eses desprazamentos.

Buscaremos un espazo para xantarmos xunt@s a un prezo asequíbel (por conta de cada quen). Tanto para o xantar como para o autobús é necesario que as persoas interesadas en acudir a esta xornada nolo comuniquedes antes do vindeiro mércores 30 de setembro ás 14 horas.

Para anotacións ou máis información podedes chamar ao teléfono 698 177 621 ou enviar un correo a contacto@casamuseomanuelmaria.gal.