Noticias
Concerto de estrea da "Cantata para coro e orquestra As rúas do vento ceibe" de Rogelio Groba
22/10/2019
Será o próximo 2 de novembro no Teatro Colón da Coruña, con entrada libre até completar as localidades
O 2 de novembro, ás 20.30, no Teatro Colón da Coruña teremos a oportunidade única de ver a estrea da Cantata para coro e música “As rúas do vento ceibe”, obra do mestre Rogelio Groba, o compositor galego vivo máis relevante.
A cantata está fundamentada no libro homónimo de Manuel María e, concretamente, nos poemas iniciais agrupados baixo o título “A Patria” (Mapa de Galiza, A fala, A bandeira, O escudo, A emigración e A colonia).
A prestixiosa e excelente Orquestra de Cámara Galega, dirixida por Rogelio Groba Otero, será a encarregada de interpretar esta obra, e faráo na compaña do Coro de Cámara de Pamplona/Iruñeko Ganbara Abesbatza, dirixida por David Gálvez Pintado e con máis de cen discos publicados.
A entrada é libre até completar o aforo.