Casa Museo Manuel María

O Diario da Casa

O noso auditorio quedou pequeno para coñecer O conto de Barriga Verde

O noso auditorio quedou pequeno para coñecer O conto de Barriga Verde
Casa-Museo Manuel María, Outeiro de Rei

O actor Fran Rei engaiolou o público de todas as idades que o pasado sábado 4 de marzo se achegou á Casa-Museo Manuel María para gozar deste conto de Avelino González inspirado en tres obras de Manuel María 

O espectáculo foi organizado conxuntamente pola Casa-Museo e as ANPAS dos CEIP de Outeiro de Rei e Rábade e fai parte da programación de actividades que todos os meses acolle o noso auditorio

Este pasado sábado 4 de marzo xa antes do mediodía tivemos que pór o cartaz de COMPLETO no auditorio da Casa-Museo Manuel María: moitísima xente chamara nos días previos para reservar entrada para O conto de Barriga Verde, o espectáculo para público infantil e familiar que estaba programado, e xa non collía máis xente. Así foi ás seis da tarde: a antiga palleira grande da casa onde naceu Manuel María estaba chea, ao final con xente de todas as idades, para recibir o actor Fran Rei, que leva representando este conto de Barriga Verde por case 50 sitios. 

Porén, esta función tivo algo de especial e de diferente: porque aínda que o Conto de Barriga Verde, unha montaxe que combina a narración, a maxia e o humor dirixida por Tareixa Campo, estea escrito polo tamén actor Avelino González, este inspirouse moito en tres obras moi importantes de Manuel María: a peza teatral Barriga verde, Os soños na gaiola e Aventuras e desventuras dunha espiña de toxo chamada Berenguela. Por iso foi moi especial que o personaxe de Barriga Verde visitase a Casa-Museo dun autor que lle deu vida no teatro. 

As case 100 persoas que asistiron á función puideron coñecer a Fiz e ao seu padriño Barriga Verde -vello e mozo ao mesmo tempo -, a Catuxa e tamén aos personaxes de Serrador e Demo. Risos, música, sorpresa e moita participación caracterizaron o espectáculo de Fran Rei. E, ao final, a aprendizaxe do conto: nada pode máis que o amor verdadeiro. 

Este espectáculo do pasado sábado foi organizado conxuntamente pola Casa-Museo, a ANPA do CEIP Laverde Ruíz de Outeiro de Rei e a ANPA do CEIP Otero Pedrayo de Rábade. Fixo parte da programación cultural que queremos que a Casa-Museo vaia acollendo de maneira periódica, orientada a públicos diversos e a un amplo abano de propostas culturais. Para esta programación contamos coa colaboración da Deputación de Lugo. 

Deputación de LugoDeputación da CoruñaConsellería de Cultura, Educación e Ordenación UniversitariaConcello de LugoConcello de OleirosFEADERagaderLEADERMinisterio de Agricultura, Alimentación y Medio AmbienteConsellería do Medio RuralTerras de Lugo