Actividades

"O infinito nun xunco" de Irene Vallejo e "Memoria da choiva" de Pedro Feijoo, últimos libros comentados no Clube de Lectura da Casa-Museo

Os textos poéticos que acompañaron a sesión do 18 de setembro foron "Patria obsidiana" de Luz Campello e "Ti es para min isa barca..." de Xohana Torres

 

O 18 de setembro retomamos o comentario de lecturas falando das dúas propostas do verán: O infinito nun xunco, de Irene Vallejo e Memoria da choiva, de Pedro Feijoo.
Curiosamente, desta volta as dúas obras tiveron valoracións dispares entre as lectoras. A historia do autor vigués, vencellada á figura de Rosalía, en xeral, enganchou e gustou, aínda que houbo quen atopou excesivo o relato dos crimes. Todas recoñecemos o acerto co que vencellou episodios da trama cos versos da autora, pero en canto ao final, de novo había opinións variadas.
O inxente ensaio de Irene Vallejo, que a maioría aínda andabamos rillando aos poucos, tamén deu pé a contrapoñer impresións entre unhas e outras; algunhas considerámola unha obra moi interesante, chea de referencias literarias e de curiosidades históricas en relación coa escritura, aínda que a súa intensidade-densidade fixo que outras decidisen pospoñer a súa lectura para outra ocasión.
Os textos poéticos desta xornada foron 'Patria obsidiana' de Luz Campello e 'Ti es para min isa barca...' de Xohana Torres, texto ao que Antón Laxe lle puxo voz a petición dunha de nós.
No seguinte encontro (o de decembro) comentaremos A lúa vai encuberta, de Manuel María, aproveitando que está a se representar nestas datas na contorna, e Esta noite hei de ir a verte, de Beatriz García Turnes. Un señor elegante, de Suso de Toro, irá na quenda de xaneiro.
Apertas de libro!

Galería de fotos

Sesión Clube de Lectura do 18 de setembro

Sesión Clube de Lectura do 18 de setembro

Eva Teijeiro (2021)

Sesión Clube de Lectura do 18 de setembro

Sesión Clube de Lectura do 18 de setembro

Eva Teijeiro (2021)