Actividades

"Flores de ferro" de María Rei

27/06/2021

Reseña da última sesión do Clube de Lectura da Casa-Museo Manuel María

 

A tardiña do 19 de xuño deu para moito na Casa-Museo, con dobre sesión do Clube de Lectura.
O encontro da sección de adultas coa escritora de Flores de ferro, María Rei, no auditorio, pechou a xornada, que comezara cunha xuntanza da rapazada na biblioteca.
A gañadora do García Barros 2020 achegounos ao proceso de escrita desta novela cuxa intriga argumental nos enganchou polo seu acerto no ritmo e na estrutura, que contrapón presente e pasado. Isto non foi froito da casualidade, senón de darlle moitas voltas e preocuparse de recibir certa formación ao respecto (onde hai que apuntarse?). Porén, os logros desta narración non se limitan á contraposición -e rencontro, dalgún xeito- de dúas xeracións moi diferentes; hai que engadirlle a intensidade das personaxes -nomeadamente as femininas-, e a ambientación dalgúns dos feitos fundamentais da trama no contexto histórico que abeira a traxedia da represión en Galiza. E aínda máis, o ameno fluír da narración acompáñase de certo lirismo expresivo e da presenza do simbólico, dende o mesmo título que se refire máis á fortaleza das protagonistas que á arte do ferreiro. 
A conversa coa autora deu pé a debullar aínda moitas outras cuestións desta novela que tanto nos encheu o ollo, malia falar tamén de novos proxectos... mesmo xurdiu a proposta dun roteiro -Camiño sen límite- pola contorna onde se desenvolve a historia, a imaxinaria Briana!
Tamén falamos de libros, claro. Inevitablemente saíu a referencia ás súas lecturas de apoio para contextualización e a algunhas nosas como Memoria de ferro, de Antón Patiño.
Vémonos en setembro, para comentar O infinito nun xunco, e outra obra aínda por decidir.
Apertas de libro.

Galería de fotos

Sesión de

Sesión de "Flores de ferro" de María Rei

Eva Teijeiro (2021)

Sesión de

Sesión de "Flores de ferro" de María Rei

Eva Teijeiro (2021)