Casa Museo Manuel María

O Diario da Casa

As nenas e nenos de 1º e 2º do colexio de Outeiro de Rei abriron a nova xeira de visitas escolares deste curso

As nenas e nenos de 1º e 2º do colexio de Outeiro de Rei abriron a nova xeira de visitas escolares deste curso
Casa-Museo Manuel María, Outeiro de Rei

Como son veciñas e veciños de Manuel María, unha parte grande xa coñecían a Casa-Museo doutras veces: cando menos o auditorio, pois acoden normalmente aos espectáculos musicais ou teatrais que se programan nel. Con todo, descubriron cousas que aínda non sabían e puideron coñecer un pouco mellor a Manuel María. 

O inverno adoita ser un pouco frío en Outeiro de Rei, e iso fai que coa chegada das vacacións do Nadal o ritmo de visitas de colexios e institutos pare un pouco para voltar, como o Cuco, pola primavera. Este curso volveu pasar o mesmo. 

Só que, neste caso, as nenas e os nenos de 1º e 2º do CEIP Laverde Ruíz de Outeiro de Rei non puideron agardar pola chegada "oficial" da primavera e aproveitaron as raiolas de sol que xa estamos a ver estes días para faceren unha visita á que foi casa natal do seu veciño poeta Manuel María, agora convertida nunha Casa-Museo. Os pasados días 15 e 16 de marzo fixeron, en varias quendas, a súa visita. 

Hai que dicir que todas e todos xa coñecían a Casa de Hortas de antes, cando menos de pasaren por diante e vela por fóra; moitas e moitos, ademais, xa estiveran cando menos na horta e no auditorio, pois veñen participar nas actividade para público infantil e familiar que adoita programar a Casa-Museo. Aínda tiñan moi fresquiño o recordo do espectáculo O conto de Barriga Verde, con Fran Rei, hai uns poucos días. 

Aínda que nos grupos había tamén quen xa visitara a Casa-Museo por dentro, coa súa familia, noutras ocasións, a visita serviulles para descubriren cousas novas sobre Manuel María e sobre as moitas obras que escribiu. E, como fixo bo os dous días, tamén lles valeu para desfrutaren por todo o alto da horta, con xogos e carreiras que a encheron de luz e de vida.

Sospeitamos que a Manuel María lle tería feito moita ilusión ver como foron, precisamente, as nenas e os nenos da súa "Tribo" os primeiros en visitaren a Casa-Museo nesta nova xeira de visitas escolares do curso 2016/17. Non todo o mundo pode dicir que teña un veciño Poeta!  

Deputación de LugoDeputación da CoruñaConsellería de Cultura, Educación e Ordenación UniversitariaConcello de LugoConcello de OleirosFEADERagaderLEADERMinisterio de Agricultura, Alimentación y Medio AmbienteConsellería do Medio RuralTerras de Lugo