O Diario da Casa

Alumnado da ESO do IES da Terra Chá Xosé Trapero Pardo visitou a Casa-Museo o pasado 19 de decembro

Alumnado da ESO do IES da Terra Chá Xosé Trapero Pardo visitou a Casa-Museo o pasado 19 de decembro
19/12/2016

Ao contrario que outros centros, que coa visita a Outeiro de Rei culminan o traballo desenvolvido previamente nas aulas arredor de Manuel María, o alumnado de Castro de Rei sitúa na casa natal do poeta o inicio da actividade escolar que comezará á volta das vacacións 

O pasado 19 de decembro un grupo de alumnas e alumnos da ESO do IES da Terra Chá Xosé Trapero Pardo do veciño concello de Castro de Rei achegáronse a Outeiro de Rei para visitaren a Casa-Museo Manuel María. Con esta súa visita podemos xa dicir que a totalidade dos centros de ensino da Terra Chá visitaron a casa natal do escritor. 

A visita comezou cun paseo de mañá até a Carballeira da Santa Isabel, espazo tan fundamental para Manuel María, e até o cemiterio onde descansan os seus restos. Xa no interior da Casa-Museo, máis ao quente, as rapazas e rapaces de Castro puideron coñecer aspectos da vida e da obra do autor ao que este ano se lle dedican as Letras Galegas. 

Aínda que neste ano o IES da Terra Chá de Castro non foi alleo ás celebracións arredor de Manuel María que caracterizaron a axenda da práctica totalidade dos centros de ensino de Galiza, será á volta das vacacións de Nadal cando comecen a implicarse máis no estudo da obra do autor que dixo que a Terra Chá "é unha patria poética". E é que se pode seguir a ler e a traballar con Manuel María con independencia de que se lle dediquen as Letras! 

Deputación de LugoDeputación da CoruñaConsellería de Cultura, Educación e Ordenación UniversitariaConcello de LugoConcello de OleirosFEADERagaderLEADERMinisterio de Agricultura, Alimentación y Medio AmbienteConsellería do Medio RuralTerras de Lugo