Actividades

A vida incerta, Madia Leva, Be water... protagonistas das últimas sesións dos clubes de lectura da Casa-Museo

A vida incerta, Madia Leva, Be water... protagonistas das últimas sesións dos clubes de lectura da Casa-Museo

17/02/2021

Reseña trimestral de 2020

 

O Clube de Lectura da Casa Museo Manuel María mantivo a súa actividade no último trimestre do 2020 con lecturas e xuntanzas lectoras, que tiveron boa acollida, malia os condicionamentos derivados do COVID 19.

O 7 de novembro tivo lugar a presentación de A vida incerta. Biografía de Virxinia Pereira, coa presenza da autora, Montse Fajardo. Foi un evento aberto ao público -na medida que iso podía facerse-, pero a maioría das persoas asistentes eran lectoras deste clube, ao ser a lectura proposta nesa altura. Á xornalista pontevedresa debémoslle a descuberta desta muller, cuxa imaxe ficou vencellada para sempre á de Castelao. Nesta ben documentada biografía amósase a inmensa contribución da estradense á obra do líder galeguista (tanto á súa realización, mesmo física en ocasións, como á salvagarda do seu legado), pero tamén a fondura das súas propias conviccións. A súa traxectoria vital adquire nesas páxinas de acertado título a visibilidade que merece.

A escolla poética duns versos de Rosalía e un dóce convite serviron de peche a esta sesión.

O 20 de decembro comentamos Madia Leva, de Ana Moreiras, despois de varios meses agardando pola súa reedición. Debullámola un tanto atrapalladamente, pospoñendo a habitual valoración xeral do inicio, pois a familiaridade con moitas das expresións empregadas e proximidade de certas escenas representadas á nosa propia experiencia vital, impeliunos a falar superpoñendo comentarios e impresións moi variadas. Dalgún xeito rebordounos a maneira na que esta obra reflicte unha forma de vida que esmorece nas aldeas da contorna chairega, que á maioría non nos resulta allea, e fixemos un espello das conversas nas airas que tan ben retrata a autora, para rematar compoñendo entre todas un mosaico final. Trátase dunha interesante ollada ao mundo feminino no rural, a través de sucesivas xeracións interrelacionadas nunha mesma parroquia; neste fío condutor aniñan múltiples problemáticas, abordadas unhas con maior profundidade que outras. Malia considerarmos algunhas de nós esta dispersión temática certa eiva para o conxunto, non nos quedou dúbida de que esta banda deseñada primeiriza enceta unha traxectoria literaria e plástica moi prometora.

O petisco poético nesta xornada foi 'Facilísimo', de María Lado, ladaíña moi ao xeito para dicirlles a algunhas personaxes de comportamento enxuizable presentes no relato ambientado en Miraz.

Esa mesma tardiña estivo na Casa-Museo Antía Yáñez, que tiña un encontro coa rapazada do Clube de Lectura Xuvenil para falar de Be water, o libro correspondente ao derradeiro trimestre do 2020. Tras unha breve presentación inicial, a escritora comezou a tirarlles da lingua para facer interactiva a actividade. Aínda que a súa proposta nun principio resultou sorprendente, e máis o xeito no que abordaba cuestións pouco presentes na narrativa xuvenil, houbo demanda dunha segunda parte. As adultas tamén tivemos ocasión de saudar á autora de Senlleiras, cando pasou pola biblioteca durante o seu percorrido guiado pola Casa Museo. Mágoa non dispor de tempo para máis...

A sección xuvenil xa comezara a súa xeira previamente, o 26 setembro, data na que houbo un encontro para falar de Unha estrela no vento, de Ledicia Costas, e 4_xinetes, de Anxo Fariña; dous rexistros narrativos ben diferentes que permitiron, porén, interrelacionar algúns personaxes polo seu liderado nun grupo de adolescentes. Esta xuntanza tivo a súa propia 'banda sonora', ao dar comezo cunha dinámica que empregou algunhas pezas musicais referidas nesas obras.

Cada unha destas actividades, coma sempre, deu pé para falar dos libros e de moitas outras cousas, habida conta das poucas ocasións que hai na actualidade para participar de eventos culturais e literarios. Como seguimos á espera de que as circunstancias sexan favorables para iniciar os faladoiros, nova proposta de lecer da Casa-Museo, aproveitamos as lecturas para deslinguarnos e vingarnos de tanto confinamento.

A sesión de comentario que estaba prevista para xaneiro non tivo lugar polas recomendacións sanitariase a lexislación vixente ao respecto: tocaría O derradeiro libro de Emma Olsen, de Berta Dávila. Decidimos pospoñer o rencontro ata mellor ocasión, e engadimos dúas pezas para ler nestes tempos incertos: Abril, de Luz Darriba e Politicamente incorrecta, de Teresa Moure.

Galería de fotos

Clube de lectura xuvenil comentando Be water coa súa autora, Antía Yáñez

Clube de lectura xuvenil comentando Be water coa súa autora, Antía Yáñez

 (2020)

Clube de lectura con Montse Fajardo, autora d'A vida incerta

Clube de lectura con Montse Fajardo, autora d'A vida incerta

 (2020)