Actividades

 A primavera chega con forza á Casa Museo Manuel María en Outeiro de Rei e trae novas propostas para seguir enchendo de contido e vida os diferentes espazos da casa natal do escritor.

De novo a música ocupará un lugar principal na oferta lúdica da Casa de Hortas para este mes de abril. Trátase, nesta ocasión, de concertos que se inscriben nos Seráns Culturais que está a organizar a Área de Cultura e Turismo da Deputación de Lugo en diferentes puntos da provincia e que terán entrada gratuíta. 

Este sábado 11 de abril, ás 18 horas, será a quenda de Pablo Díaz, quen a través dun concerto familiar compartirá co público os temas do seu disco máis recente, Xente miúda moita fartura. O universo en que se move esta nova proposta é de pequeno tamaño, como a xente á que vai dedicado. Fala das cousas máis próximas á vida d@s miúd@s, como os insectos, recoller os xoguetes, as cremas de verduras ou celebrar en galego un aniversario.

O sábado 18 de abril, ás 21 horas, o auditorio da Casa Museo acollerá un concerto musical de Caxade. Caxade é o novo proxecto persoal de Alonso Caxade. Indie-folk cun arrecendo a música minimalista e a sons bucólico-pastorís da vella Europa. Música elegante, modesta e sinxela, surrealismo pos-modernista e discurso reivindicativo, metafórico e irónico.

Aínda que ambos os concertos teñen entrada gratuíta, o aforo limitado do auditorio fai que sexa preferíbel reservar entrada previamente. Pódese facer polas canles habituais: no teléfono 698 177 621 ou a través do correo-e fundacion@manuelmaria.com